Një nuse është qëlluar për vdekje ditën e saj të dasmës në një fshat pranë qytetit juglindor francez të Avignonit, pasi persona të maskuar hapën zjarr në drejtim të çiftit. Një prej agresorëve të dyshuar po ashtu u vra gjatë një shkëmbimi zjarri, ndërsa dhëndri dhe një fëmijë 13-vjeçar u plagosën rëndë gjatë incidentit në fshatin Goult. Forca të shumta policie shkuan drejt vendngjarjes dhe u vunë në kërkim të të dyshuarve që sarritën të largoheshin me shpejtësi. Mediat franceze raportojnë se dhuna mund të lidhet me larje hesapesh që lidhen me drogën. Nusja 27 vjeçe dhe dhëndri 25 vjeçar po largoheshin nga dasma në sallën e fshatit kur sulmues të paidentifikuar hapën zjarr, raporton agjencia e lajmeve AFP. Raportet fillestare sugjeruan se njëri nga sulmuesit ishte shtypur nga makina e çiftit, por prokurorja e Avignonit, Florence Galtier, iu referua të dyshuarit si të vrarë pasi në vengjarje kishte pasur dhe shkëmbim zjarri. Policia thotë se në kohën e sulmit në sallë ndodheshin gjithsej 28 persona. Një grua u plagos lehtë në incident.