Nxehtësia ekstreme dhe thatësira e kësaj vere kanë bërë që uji në Danub, të bjerë në nivele ekstreme, duke zbuluar të gjitha thesaret që ai mban. Të paktën 20 anije luftarake gjermane, të luftës së dytë botërore, kanë dalë në dritë ndërsa niveli i ujit është tkurrur, pranë Prahovos, në serbinë lindore. Flota naziste u fundos në 1944, kur forcat gjermane po tërhiqeshin dhe komanda vendosi të fundoste më shumë se 200 luftanije për të bllokuar avancimin e ushtrisë sovjetike. Sot, trupat e ndryshkur dhe direkët e thyer kanë dalë mbi ujë duke krijuar madje edhe pengesa për lundrimin. Shumë prej këtyre anijeve mbajnë ende eksplozivë dhe municione të pashpërthyera. Përveç anijeve naziste, terrenet e thara të lumit kanë zbuluar pasuri të tjera historike dhe arkeologjike përgjatë rrjedhës së tij, duke përfshirë mbetjet e Urës së lashtë të Kostandinit në Bullgari, një bombë ajrore britanike në Sllovaki, si dhe fosile mamuthësh që datojnë mijëra vjet më parë. Valët e njëpasnjëshme të të nxehtit në Evropë këtë verë kanë shkaktuar thatësira të mëdha në kontinentin që po nxehet më shumë në botë, duke prekur rrugët kryesore ujore, siç janë Danubi dhe Rini.