Danimarka ka ndaluar të gjitha fluturimet e dronëve civilë këtë javë përpara një samiti të Bashkimit Evropian në Kopenhagen, tha të dielën ministria e transportit të vendit. Ministria tha se vendimi u mor me qëllim "thjeshtimin e punës të organeve të sigurisë" dhe se nuk mund të toleroheshin "dronë të huaj që krijojnë pasiguri". Danimarka është një nga disa vende evropiane që kanë raportuar "incidente me dronë misteriozë" në javët e fundit, me mjetet që janë parë mbi bazat ushtarake daneze deri të shtunën. Ministrat e mbrojtjes nga 10 vende të BE-së kanë rënë dakord të krijojnë një "mur dronësh" në përgjigje të incidenteve dhe NATO thotë se ka "rritur vigjilencën" në të gjithë Baltikun. Në deklaratën e saj, ministria e transportit tha se policia ishte në "gatishmëri të shtuar" përpara samitit të kësaj jave dhe se ajo duhej të "kujdesej për danezët dhe mysafirët që priten në vend”. Ndalimi do të mbetet në fuqi deri më 3 tetor dhe shkeljet mund të rezultojnë në gjobë ose burgim deri në dy vjet. Danimarka aktualisht mban presidencën e radhës të Këshillit të BE-së. Drone të paidentifikuar janë raportuar në Danimarkë që nga 22 shtatori, kur pamjet e tyre detyruan mbylljen e aeroporteve të Kopenhagenit dhe Oslos. Aeroportet e Aalborgut dhe Billundit u detyruan gjithashtu të pezullonin operacionet javën e kaluar për shkak të aktivitetit të dronëve. Hetuesit danezë ende nuk kanë qenë në gjendje të identifikojnë personat përgjegjës për fluturimet, por ministrja e mbrojtjes e quajti atë një "sulm hibrid" që ishte pjesë e një "operacioni sistematik". Kryeministrja daneze Mette Frederiksen tha se autoritetet ende po hetojnë se kush qëndronte pas inkursioneve por refuzoi të përjashtonte Rusinë. Moska ka hedhur poshtë ndërkohë akuzat për përfshirjen e saj.