Ministri i Jashtëm danez Lars Rasmussen duke e quajtur si pozitiv vendimin e Trump për të mos përdorur forcën në Groelandë, theksoi se shpreson që "vijat e kuqe" të Danimarkës do të respektohen në çfarëdo që të ndodhë më pas. "Ajo që ishte mjaft e qartë pas këtij fjalimi është se ambicia e presidentit është e paprekur", u tha Rasmussen gazetarëve ndërsa shtoi se bisedimet diplomatike do të vazhdojnë midis dy vendeve. "Marrëveshja që bëmë në Uashington javën e kaluar, me nënpresidentin e tij (JD Vance) dhe ministrin e tij të jashtëm (Marco Rubio), është se do të fillojmë diskutime të nivelit të lartë për të parë nëse jemi në gjendje t'i pranojmë shqetësimet amerikane... në një mënyrë që respekton vijat tona të kuqe", tha ai. Ndërsa shtoi: “Ne nuk po fillojmë asnjë negociatë bazuar në heqjen dorë nga disa parime themelore. Ne kurrë nuk do ta bëjmë këtë.” Presidenti amerikan Donald Trump gjatë fjalimit qe mbajti kërkoi me cdo kusht Groenlandën ndërsa tha se është i gatshëm të ulet e të flasë për çmimin por mohoi që do të përdorë forcën për ta marrë.