Lufta për pushtet e lidership mes demokratëve u zhvendos në dyert e Komisionit Qëndror të Zgjedhjeve. Presioni i kohës për regjistrim në zgjedhje solli edhe pasaktësi në dokumentacionet e depozituara. Neni 64 i Kodit Zgjedhor specifikon shtatë dokumentet që duhen dorëzuar për regjistrim në zgjedhjet. Rithemelimi i Berishës depozitoi 47 faqe dokumente, por jo ato që kërkon ligji. Gjykata e Tiranës lëshoi vërtetimin se kryetari zyrtar i Partisë Demokratike është Lulzim Basha. Ky i fundit delegoi kompetencat e tij tre personave: Enkelejd Alibeajt, Gazmend Bardhi dhe Indrit Sefa. Krahasimisht me partitë e tjera, Rama i ka deleguar Erdian Salianjit të veprojë në emër të tij për veprimet e nevojshme në KQZ. Ndërkohë kreu i Partisë së Lirisë, Ilir Meta nuk autorizon asnjë person dhe zgjedh të ushtrojë çdo kompetencë që i njeh ligji, i vetëm.