Gjykata Kushtetuese i ka dhënë të drejtë kërkesës së Sali Berishës mbi tre qëndrimet e gjykatave më të ulëta lidhur me masën e arrestit shtëpiak. Kushtetuesja e ka cilësuar kohëzgjatjen e mbajtjes nën arrest shtëpiak të Berishës si të tejzgjatur. Në vendimin e dhënë pas përfundimit të seancës, Kushtetuesja argumenton se gjykatat lejuan vijimin e masës së sigurimit personal arrest shtëpie për një periudhë shtatë mujore duke iu referuar të njëjtave nevoja si në rastin e parë të sigurimit, Masa arrest shtëpie u mor pas refuzimit të berishës për të respektuar masën e sigurisë detyrim paraqitje që iu caktua në fillim nga GJKKO dhe ajo e ndaljes jashtë shtetit. “Në vlerësimin e Gjykatës, vetëm një rrethanë e tillë nuk mund të justifikojë vijimin e zbatimit ndaj kërkuesit të masës “Arresti në shtëpi”, pra nuk mund të përbëjë arsye të mjaftueshme për zgjatjen në kohë të gjatë të kufizimit të lirisë, pa arsyetuar për ndonjë arsye të re që justifikon vijimin e masës konkrete (“Arresti në shtëpi”). Për këtë arsye, Gjykata vlerësoi se vendimet objekt i këtij gjykimi kushtetues, që kanë disponuar për vijimin e masës së sigurimit “Arresti në shtëpi”, vijnë në kundërshtim me Kushtetutën.”m thuhet në vendim. Për shkak se masa e sigurimit “Arresti në shtëpi” nuk është më në fuqi, pasi Gjykata e Posaçme e Apelit për Korrupsionin dhe Krimin e Organizuar ka vendosur zëvendësimin e saj me masën e sigurimit “Detyrimi për t’u paraqitur në Policinë Gjyqësore”, Kushtetuesja vendosi të mos i shfuqizojë vendimet objekt të këtij shqyrtimi kushtetues. Pra Berisha do vijojë të përballet në gjykatë për dosjen Partizani, ndonëse Kushtetuesja I dha të drejtë për pjesën e arrestit shtëpiak.