Pothuajse katër vite hetime janë përmbyllur pa rezultat dhe ekspertët e Organizatës Botërore të Shëndetësisë nuk janë ende në gjendje që të tregojnë me saktësi origjinën e Covid-19, virusit që mori jetën e miliona njerëzve dhe izoloi për muaj me radhë botën. Grupi i ekspertëve thotë se çështja se si filloi COVID-19, mbetet e pazgjidhur. Raporti përfundimtar mbi sëmundjen përmend mungesën e qasjes tek të dhënat kyce sidomos nga Kina, si arsyen kryesore për këtë situatë. Edhe pse shumë prova shkencore duket se e mbështesin teorinë se virusi e ka origjinën nga kafshët dhe është përhapur te njerëzit, ekspertët e OKB-së thonë se nuk e përjashtojnë dot plotësisht edhe idenë e zanafillës në laborator. Pa qasje në qindra sekuenca gjenetike virale dhe të dhëna të detajuara të biosigurisë nga Kina, grupi nuk mundi të arrinte në një konsensus. Nëse OBSH është e dyzuar për idenë e daljes së virusit nga një laborator, për shërbimet inteligjente amerikane është e sigurt se ai rrodhi nga laboratori i Uhanit në Kinë. OBSH e ka konsideruar këtë përfundim të amerikanëve si spekulativ, të politizuar dhe të pambështetur shkencërisht. Edhe Kina ka hedhur poshtë këto pretendime të amerikanëve.