Edhe kjo e shtunë ka shënuar shifra të larta të infektimeve me koronavirus dhe humbjet e jetëve. Në harkun kohor të 24 orëve të fundit janë shënuar shtatë humbje jete dhe 786 raste të reja me koronavirus. Ndërkohë situata në të 4 spitalet covid, të paktën sipas shifrave duket se nuk ka mbingarkesë. Aktualisht po trajtohen 271 pacientë, 19 në terapi intensive nga të cilët 4 pacientë janë të intubuar. Nga ana tjetër numri i të shëruarve përgjatë intervalit kohor të 24 orëve është 489 qytetarë, duke e çuar numrin e të shëruarve në 43 mijë e 384 që nga fillimi i epidemisë. Ministria e Shëndetësisë dhe Mbrojtjes Sociale u bën apel qytetarëve të mos e ulin vigjilencën në zbatimin e rregullave antiCOVID. Madje, këshillat e saj të përhershme lidhen me vendosjen e maskave mbrojtëse në çdo ambient jashtë shtëpisë; shmangnia e grumbullimeve dhe ruajtja e distancimit fizik; kujdesi për higjenën vetjake, si të vetmet mënyra për të parandaluar përhapjen e COVID-19. Ministria e Shëndetësisë dhe Mbrojtjes Sociale u drejtohet qytetarëve të mos neglizhojnë asnjë shenjë të sëmundjes dhe të kontaktojnë për çdo dyshim me mjekun e familjes për të kryer testimin si dhe për ndjekjen dhe trajtimin ambulator në banesë.