Mjeku Tritan Kalo kërkon që qytetarët të rrisin vigjelencën dhe të shtojnë kujdesin, pasi virozat e vjeshtës e përkeqësojnë situatën. Sipas tij, vjeshta mbart jo vetëm një tendencë rizgjimi të rasteve të infeksioneve nga Sars Cov29, por së bashku me to shtohen në qarkullim edhe Infeksione të shumta Virale stinore, që në shfaqjen e tyre klinike janë të përngjashme mes tyre me koronavirusin. Ndryshimet e temperaturës me tendencë uljen e tyre, rifillimi i vitit shkollor, shtimi i kontakteve në mjediset e mbyllura, rihapja e shumë aktiviteteve socio-ekonomike, shtimi i qarkullimit me mjetet e transportit publik, tendenca në ulje që po vërehet në lidhje me përkujdesin individual, distancimin fizik si dhe higjenizimin e mjedisit tonë ndaj rrezikut prej koronavirusit, dashur pa dashur do të ndikojnë në shtimin e këtyre rasteve – thotë mjeku Kalo, që prej muajsh është në vijën e parë të luftës ndaj këtij virusi të rrezikshëm. Duke hedhur poshtë versionin se virusi prek vetëm të moshuarit dhe jo moshat e tjera, mjeku apelon për të shtuar kujdesin, pasi edhe infeksionet virale stinore shoqërohen ose me prekjen e rrugëve respiratore, ose prekje të traktit tretës.