Një raport i Kongresit amerikan mbi origjinën Sars-Cov 2, që shkaktoi pandeminë e Covid që u mori jetën mbi 7 milionë vetëve në mbarë botën, thotë se me shumë mundësi virusi rrodhi nga një laborator. Raporti prej 520 faqesh komitetit hetimor të udhëhequr nga republikanët thotë se provat e grumbulluara në pesë vite hetime sugjerojnë se virusi ka rrjedhur aksidentalisht, ose jo, nga një laborator. Në të njëjtin përfundim kanë arritur më herët edhe raportet hetimore të FBI-së, rrjetit kombëtar të laboratorëve amerikanë si dhe inteligjenca kombëtare amerikane, NSA. Megjithatë, këto pretendime të tyre janë hedhur poshtë nga Antonio Fauçi, që udhëhoqi Institutin Shëndetësor të SHBA dhe përcaktoi politikat anti Covid. Fauçi, një imunologjist në profesion, këmbënguli në atë kohë se është e pamundur që virusi të ketë rrjedhur nga një laborator dhe se ai është transferuar nga kafshët të njerëzit pasi ka pësuar mutacion. Teoria e Fauçit është kundërshtuar nga republikanët, që e akuzojnë atë se u përpoq të fshehë faktin se institute që drejtonte ka financuar me 600 mijë dollarë laboratorin e Uhanit në Kinë, ku u shfaqën rastet e para të sëmundjes. Raporti i republikanëve është një tjetër mbështetje për Donald Trump, që është zotuar se do të bëjë Kinën që të paguajë dëmet e shkaktuara nga pandemia.