Bosnje e Hercegovina planifikon të porosisë vaksina kundër koronavirusit nga Kina dhe Rusia, nga frika se dërgesat e porositura përmes skemës COVAX dhe Bashkimit Evropian do të arrijnë vonë. COVAX është program i Organizatës Botërore të Shëndetësisë, i cili synon shpërndarjen e vaksinave kundër koronavirusit edhe në vende më të varfra. Imunizimi në Ballkanin Perëndimor ka nisur në Serbi - vendin që i ka porositur direkt vaksinat Pfizer/BioNTech nga Evropa/SHBA-ja, Sputnik V nga Rusia dhe Sinopharm nga Kina. Por, Bosnja e Hercegovima, Kosova, Maqedonia e Veriut dhe Mali i Zi nuk kanë marrë ende asnjë vaksinë. Shqipëria ka marrë një sasi të kufizuar. Bosnja ka porositur 1.2 milion vaksina përmes skemës COVAX dhe gati 900,000 vaksina nga BE-ja për dy rajonet e saj autonome, Federatën Boshnjako-Kroate dhe Republikën Sërpska, dhe pret që grupi i parë të mbërrijë së shpejti, tha kryeministri Zoran Tegeltija. Skema COVAX pritet të fillojë shpërndarjen e vaksinave në vendet e varfra dhe me të ardhura të mesme në muajin shkurt. Por, kjo skemë ka luftuar për sigurimin e dozave të mjaftueshme për shkak të mungesës së fondeve, ndërsa vendet e pasura kanë rezervuar vëllime të mëdha vaksinash për veten e tyre. Qeveria qendrore e Bosnjës, nuk e ka autoritetin të porosisë vaksina direkt nga prodhuesit. Dy rajonet e saj gjithashtu mund të bëjnë porosi vetëm përmes agjencive të autorizuara.