Kryetari i Parlamentit të Gjeorgjisë, Shalva Papuashvili, tha se ka firmosur ligjin e shumë polemizuar për “agjentët e huaj”, i cili shkaktoi protesta masive në këtë vend për javë të tëra. Presidentja pro-perëndimore e Gjeorgjisë, Salome Zurabishvili, i vuri veton ligjit, pasi ai u miratua muajin e kaluar. Por, vetoja e saj u përmbys në një votim parlamentar dhe, pastaj, ajo refuzoi ta miratonte masën. Me Kushtetutën e Gjeorgjisë, nëse presidentja refuzon ta miratojë një ligj, pasi vetoja e saj anulohet nga ligjvënësit, i takon kryetarit të parlamentit ta bëjë një gjë të tillë. Ligji, për të cilin kritikët thonë se është modeluar sipas një ligji rus, për të shtypur opozitën dhe zërat e tjerë kundër. kërkon nga OJQ-të që marrin më shumë se 20 për qind të fondeve nga jashtë, të regjistrohen si “agjentë të huaj me ndikim”.