Policia japoneze arrestoi një ushtar 18 vjecar të mërkurën pasi ai qëlloi dhe vrau dy instrukturë dhe plagosi një të tretë në një poligon qitjeje të ushtrisë në Japoninë qendrore. Incidenti ndodhi në qytetin Gifu dhe ishte i pari i këtij lloji mes forcave të armatosura japoneze që nga 1984. Të tre instruktorët, që sipas mediave japoneze përfshinin një burrë në të 50-tat dhe dy tek të 20-tat, u dërguan në spital por dy prej tyre nuk mundën të mbijetonin. Autori, që është tani në duart e policisë, iu bashkua ushtrisë në prill. “Ne do të hetojmë shkaqet e incidentit për tu siguruar që dicka e tillë nuk do të përsëritet kurrë më”, thanë zyrtarët japonezë. Të shtënat me armë janë jashtëzakonisht të rralla në Japoni, ku pronësia e një arme zjarri është e rregulluar me norma të rrepta dhe kushdo që do të sigurojë një të tillë duhet të kalojë kontrolle rigoroze. Vitin e shkuar pati katër vdekje me armë zjarri në japoni sipas agjencisë kombëtare të policisë. Mes tyre ishte ish kryeministri i vendit Shinzo Abe, që u qëllua dhe u vra me një armë të bërë vetë, në korrik. Ndërkohë, dy viktimat e regjistruara të mërkurën vijnë pasi një helikopter ushtarak u përplas në det me 10 pjesëtarë të ushtrisë në bord, në prefekturën jugore të Okinavas, në prill.