Rusia lëshoi rrebeshe raketash mbi qytetet ukrainase, në mesin e ditës, të hënën, duke vrarë të paktën 29 civilë dhe duke dëmtuar rëndë spitalin më të madh të fëmijëve në Kiev, në sulmin më vdekjeprurës të kryer në muaj të tërë. Presidenti ukrainas, Volodymyr Zelensky, tha se “mbi 40 raketa të llojeve të ndryshme” shënjestruan Kievin, Dnipron, Krivi Rih-un në qendër të Ukrainës dhe Kramaorskun dhe Slovjanskun në rajonin lindor të Donjeckut. “Të gjitha shërbimet janë të angazhuara për të shpëtuar sa më shumë njerëz”, tha ai përmes një postimi në platformën X. Kryebashkiaku i Kievit, Vitaliy Klitschko, i tha agjencisë Reuters se ky ishte “një prej sulmeve më të rënda” të kryera në kryeqytetin ukrainas në 28 muaj luftë. Imazhet e publikuara nga agjencitë e lajmeve tregojnë spitalin e fëmijëve Ohmadyt, në Kiev, dhe njerëzit e vendosur në radhë njëri pas tjetrit duke ndihmuar në pastrimin e vendit nga rrënojat. “Ka njerëz nën rrënoja, numri i saktë i viktimave nuk dihet”, tha Zelensky në rrjetet sociale, duke thënë se spitali Ohmadyt “është një prej spitaleve më të rëndësishme të fëmijëve, jo vetëm në Kiev, por po ashtu në Evropë”. Ministria e Brendshme e Ukrainës tha se numri i personave që janë konfirmuar të vrarë është të paktën 29, ndërkaq mbi 50 të tjerë janë plagosur në sulmet e të hënës. Forcat ajrore të Ukrainës shpallën gatishmëri ajrore në mbarë Ukrainën para mesditës së të hënës, pas kërcënimit të dyshuar për sulme me raketa balistike, ndërsa thanë se po luftojnë që të zmbrapsin sulmet ndaj Kievit. Shpërthimet në Kiev u dëgjuan rreth orës 10:30 sipas orës lokale, ndërsa administrata ushtarake e qytetit u kërkoi qytetarëve të qëndronin në vendstrehime derisa të ndalej alarmi për sulme ajrore. Ushtria tha se më pas u lëshua alarmi për sulme në mbarë vendin. Sulmet gjatë ditës në Ukrainë janë të rralla, edhe pse Rusia prej gjashtë muajsh ka intensifikuar bombardimin e qendrave të banuara të Ukrainës dhe ka shënjestruar infrastrukturën e energjisë.