Elon Musk, i cili është mburrur se i ka futur agjencitë federale amerikane "në makinën grirëse" ndërsa ul shpenzimet e qeverisë, doli me një sharrë elektrike në dorë para konservatorëve amerikanë që festonin rikthimin e Presidentit Donald Trump në shtëpinë e bardhë. Presidenti i Argjentinës Javier Milei, i cili ka përdorur një sharrë elektrike si simbol të shtytjes së tij për të rivendosur disiplinën fiskale, i dha Musk mjetin elektrik përpara një turme brohoritëse në Konferencën e Veprimit Politik Konservator (CPAC). Njeriu më i pasur në botë, i cili u shfaq me syze dielli, një kapelë bejsbolli dhe një gjerdan të madh në qafë, parakaloi lart e poshtë në skenë përpara se ta linte atë mënjanë dhe të thoshte se "po jetonte një meme". "Ne po përpiqemi të bëjmë gjëra të mira. Por gjithashtu, ju e dini, duhet edhe të kalojmë mirë duke e bërë këtë...", tha Musk për përpjekjet e tij për uljen e kostove, të cilat deri më tani e kanë parë atë të mbyllë agjencinë përgjegjëse për dërgimin e ndihmës amerikane në vendet më të varfra në botë dhe të pushojë mijëra punëtorë federalë. Në konferencën e përvitshme konservatore, pritet të marrin pjesë këshilltari i Sigurisë Kombëtare i Shtëpisë së Bardhë, Mike Ëaltz, Sekretarja e Sigurisë Kombëtare Kristi Noem dhe Kryetari i Dhomës së Përfaqësuesve, Mike Johnson. Vetë Trump do t'i drejtohet konferencës të shtunën.