Vlerat e Bitcoin-it dhe arit arritën rekorde të reja këto ditë, të nxitura nga pasiguria financiare në rritje e lidhur me mbylljen e qeverisë amerikane dhe nga një krizë e re politike në Francë. Më pak se një muaj pas emërimit të tij, kryeministri francez Sébastien Lecornu dha dorëheqjen të hënën, duke trazuar aksionet dhe obligacionet në ekonominë e dytë më të madhe të Evropës. Çmimi i arit po i afrohej 4,000 dollarëve për ons ose 123 dollarëve për 1 gram, në fillim të javës, përpara se të binte në nën 3,970 dollarë të martën. Kërkesa për metalin e çmuar është rritur vazhdimisht që nga fillimi i vitit. Rritja e cmimit të arit është nxitur pjesërisht nga rritja e kërkesës së bankave qendrore dhe tensionet gjeopolitike, të cilat i drejtojnë investitorët drejt mbrojtjes nga inflacioni. Një dollar më i dobët, i cili e bën arin relativisht më të lirë për ata që mbajnë monedha të tjera, ka ndihmuar gjithashtu. Ndërkohë, Bitcoin-i, ose ndryshe ari dixhital, u ngjit në mbi 125,000 dollarë të dielën, duke arritur një rekord të ri. Kriptomonedha më e fortë në botë është rritur në vlerë me më shumë se 30% këtë vit, pjesërisht për shkak të politikave miqësore ndaj kriptovalutave të administratës amerikane dhe shqetësimeve në lidhje me zhvlerësimin e dollarit. Megjithatë, ekspertët tregohen të kujdesshëm dhe paralajmërojnë se entuziazmi rreth asetit kripto mund të mos zgjasë shumë.