CIA ka publikuar dy video të reja që synojnë të joshin zyrtarët kinezë për të spiunuar vendin e tyre për llogari të Shteteve të Bashkuara, duke shfrytëzuar zhgënjimin brenda burokracisë së madhe të Kinës dhe frikën nga spastrimi i pamëshirshëm anti-korrupsion i udhëheqësit Xi Jinping. Klipet e prodhuara me elegancë, të filmuara në gjuhën mandarine me titra kineze, janë përpjekja e fundit nga agjencia amerikane e spiunazhit për tërritur mbledhjen e të dhënave të inteligjencës nga Kina, vend ky që shihet nga administratat e njëpasnjëshme si rivali kryesor strategjik dhe kërcënim ushtarak për Amerikën. Agjencia e inteligjencës së Kinës ka nisur gjithashtu një fushatë shumë publike në mediat sociale gjatë dy viteve të fundit duke paralajmëruar qytetarët e saj kundër spiunazhit për llogari të vendeve të huaja dhe që të jenë vigjilentë ndaj përpjekjeve për rekrutimin e tyre. John Ratcliffe, drejtori i CIA-s, është zotuar ta bëjë kërcënimin që paraqet Kina një përparësi kryesore dhe është zotuar të zgjerojë fokusin e agjencisë në Pekin. Tetorin e kaluar, CIA publikoi një video me tekst dhe udhëzime se si mund të kontaktohej në mënyrë të sigurt agjencia në internet. Kjo ishte pjesë e një përpjekjeje më të gjerë për të rekrutuar informatorë të rinj në Kinë, Iran dhe Korenë e Veriut.