Këshilltari i lartë në Departamentin Amerikan të Shtetit, Derek Chollet dhe emisari për Ballkanin Perëndimor, Gabriel Escobar kanë raportuar në Senatin e SHBA-së në lidhje me situatën në Ballkanin Perëndimor. Asociacioni i komunave me shumicë serbe në veri të Kosovës, si pjesë e planit për normalizimin e marrëdhënieve mes dy vendeve, ka qenë një nga temat e diskutimet në raportim. Chollet deklaroi prerazi se nuk do të ketë një Republikë Serbe në Kosovë, pasi SHtetet e Bashkuara të Amerikës nuk e duan dhe nuk e mbështetin një ide të tillë. “Asociacioni është një marrëveshje që është bërë para 10 vjetësh. E rëndësishme është që ne duam që të gjithë qytetarët e Kosovës të marrin shërbimet e barabarta dhe t’u dëgjohet zëri dhe që serbët e veriut të jenë më pak të lidhur me Beogradin. Ne nuk do të pranojmë dhe as nuk do të mbështesim asgjë që mund të krijojë një republikë serbe. Ajo që po shikojmë është se si mund të jetë i pranueshëm Asociacioni për të dyja palët”, ka thënë Chollet. Chollet solli në vëmendjhe gjatë fjalës së tij se ka biseduar në telefon me liderët e dy vendeve, Kurtin e Vuçiçin, me të cilët ka rënë dakored se duhet të ecet përpara me procesin e normalizimit të marrëdhënieve, që po drejtohet nga Bashkimi Europian.