Disa ditë para se dy studentë të diplomuar në Universitetin e Floridas të zhdukeshin muajin e kaluar, një shok dhome i njërit prej studentëve dyshohet se i bëri chatbot-it të inteligjencës artificiale ChatGPT një pyetje të pazakontë. “Çfarë ndodh nëse një njeri e vendosin në një qese të zezë mbeturinash dhe e hedhin në një kontenier plehrash?”, pyeti Hisham Abugharbieh më 13 prill, sipas hetimeve të prokurorëve të Floridës. ChatGPT u përgjigj se tingëllonte e rrezikshme, thuhet në dokument, dhe Abugharbieh më pas bëri një pyetje tjetër: “Si do ta zbulonin?” Bisedat në ChatGPT tashmë po përdoren si prova në hetimet penale. Për hetuesit, këto regjistra bisedash mund të ofrojnë detaje të vlefshme mbi psikologjinë dhe motivin e një të dyshuari. “Mendoj se çdo komunikim me chatbot-et e inteligjencës artificiale është një thesar për agjencitë e zbatimit të ligjit”, tha për CNN Ilia Kolochenko, një ekspert i sigurisë kibernetike dhe avokat në Uashington, DC. “Të dyshuarit besojnë se ndërveprimet e tyre me inteligjencën artificiale do të mbeten konfidenciale ose të paktën do të mbeten të pazbuluara, kështu që ata shpesh bëjnë pyetje shumë të drejtpërdrejta.” Rastet penale nënvizojnë përdorimin në rritje të chatbot-eve të inteligjencës artificiale për këshilla personale dhe mungesën e mbrojtjes së privatësisë në këto biseda. Ndërsa chatbot-et e inteligjencës artificiale janë bërë me shpejtësi një burim i zakonshëm për këshilla ligjore, diagnoza mjekësore dhe terapi, këto biseda nuk mbrohen ligjërisht në të njëjtën mënyrë siç do të mbroheshin me një avokat, mjek ose psiokolog i licencuar.