Pas rreth tre orësh bisedime me presidentin rus Vladimir Putin në Moskë, të dërguarit e SHBA-së, Steve Ëitkoff dhe Jared Kushner, janë nisur drejt Kievit, ku pritet të takohen me presidentin ukrainas Volodymyr Zelensky. Takimi me Putinin u zhvillua mbrëmjen e të shtunës në Kremlin dhe, sipas zyrtarëve rusë, ishte “substancial, shumë i sinqertë dhe konstruktiv”. Të dërguarit amerikanë i paraqitën Putinit qëndrimin e Uashingtonit dhe tani pritet që t’ia përcjellin palës ukrainase pikëpamjet e presidentit rus për negociatat që do t’i japin fund konfliktit mes dy vendeve. Një zyrtar i Shtëpisë së Bardhë tha se gjatë takimit u diskutuan plane konkrete për hapat e ardhshëm, të cilat pritet të bëhen publike në javët në vijim. Ndihmësi i Kremlinit, Yury Ushakov, deklaroi se Ëitkoff dhe Kushner paraqitën gjithashtu një sërë idesh për mënyrën se si mund të arrihet një zgjidhje dhe përcollën interesimin e SHBA-së për t’i dhënë fund sa më shpejt luftimeve. Megjithatë, Moska vazhdon të insistojë se një marrëveshje duhet të adresojë atë që Kremlini i quan “shkaqet rrënjësore” të konfliktit. Këtu përfshihen kërkesa që lidhen me statusin e Ukrainës ndaj NATO-s dhe kufizimin e kapaciteteve të saj ushtarake, kërkesa që Kievi i ka kundërshtuar vazhdimisht.