Pyetja që rëndon në mendjet e njerëzve në seul, këtë të mërkurë, është: çfarë po mendonte presidenti? Në një fjalim natën vonë që zhyti parlamentin e Koresë së Jugut në kaos dhe testoi përkushtimin e vendit ndaj demokracisë, Presidenti Yoon Suk Yeol deklaroi se ai po vendoste ligjin ushtarak. Më pak se 24 orë më vonë, e ardhmja e tij politike është në fije të perit, me protesta në rrugë dhe procedura për shkarkimin e tij. Ligji ushtarak ka hyrë në fuqi për herë të fundit në Korenë e Jugut në vitin 1979, pas vrasjes së sundimtarit të atëhershëm ushtarak në një grusht shteti. Koreja e Jugut e sotme, megjithatë, është shumë larg nga ajo e atëhershme dhe nga vitet represive që pasuan. Është një demokraci e qëndrueshme dhe e begatë - megjithatë presidenti pretendoi se po e linte vendin në dorë të ushtrisë për ta shpëtuar atë nga forcat e errëta. Ai e quajti Asamblenë Kombëtare të kontrolluar nga opozita një "strofkë kriminelësh" që "po përpiqej të paralizonte" qeverinë. Disa orë më vonë, ai u detyrua të tërhiqej pasi protestuesit dhe ligjvënësit e zemëruar u mblodhën jashtë Asamblesë Kombëtare - deputetët hynë brenda dhe votuan për heqjen e ligjit ushtarak. Deklarata e tij tronditëse ishte, në fakt, një përpjekje për të marrë atë lloj kontrolli mbi pushtetin që ai nuk e ka patur asnjëherë që kur fitoi presidencën në 2022 me diferencën më të vogël në historinë e Koresë së Jugut. Dhe prej atëherë nuk ka kaluar as edhe një muaj të vetëm pa polemika. Në fund të vitit 2022, ai u kritikua për reagimin e qeverisë së tij ndaj ngjarjes tragjike gjatë Halloëeenit, ku mbetën të vdekur 159 të rinj në Seul. Më pas pati thirrje për të hetuar bashkëshorten e tij pasi që kishte pranuar si dhuratë një çantë Dior, pavarësisht që nuk mund ta bënte këtë. Në prill të këtij viti, partia e tij u mposht në zgjedhjet parlamentare, duke e lënë atë në një pozicion të vështirë. Vetëm këtë javë ai u përfshi në një betejë politike me ligjvënësit e opozitës për buxhetin e vendit. Edhe përpara se t'u thoshte koreano-jugorëve se po ua pezullonte të drejtat e tyre, shkalla e miratimit të tij ishte nën 20%. Ajo që u pa qartë në fjalimin e tij të mbrëmshëm ishte se ai ishte i frustruar me parlamentin e kontrolluar nga opozita. Por presidenti duket se i bëri gabim llogaritë. Ai tani do përballet me gjykimin e parlamentit dhe popullit, që refuzuan sfidën më të rrezikshme ndaj demokracisë në vend që nga vitet 1980-të.