Inspektoriati i Lartë i Drejtësisë ka nisur verifikimet me iniciativë për rastin e ndalimit të avokatit Ulian Barjami nga policia e Elbasanit. Inspektorët e ILD janë paraqitur të hënën në Gjykatën e Elbasanit, ku kanë tërhequr një kopje të audio regjistrimit nga seanca e datës 17 tetor si dhe një kopje të transkriptimit të debatit mes prokurorit dhe gjykatëses nga njëra anë me avokatin Ulian Barjami. Ndërhyrja e Inspektoriatit të Lartë të Drejtësisë dhe e Këshillit të Lartë të Prokurorisë është kërkuar edhe nga Dhoma Kombëtare e Avokatisë, që e konsideroi arrestimin e avokatit Ulian Barjami një precedent flagrant të keqinterpretimit të ligjit dhe të rrezikshëm për drejtësinë në vend. Dhoma e Avokatisë doli me një vendim për bojkot pesëditor të dielën, ndërsa të hënën, kur prokuroria u tërhoq dhe urdhëroi lirimin e avokatit tha se bojkoti qëndron në fuqi, pasi protesta nuk lidhet vetëm me këtë rast, por me frymën e përgjithshme në sistemin e drejtësisë që po e çon vendin drejt një republike prokurorësh.