Pasojat e përmbytjeve pas daljes së Lumit Vjosë nga shtrati, vijojnë të ndihen nga banorët e fshatit Bishan. Ata ankohen për mungesë ushqimi per bagetine, ndërsa kullotat janë shkatërruar nga përmbytja. Pesëmbëdhjetë banesa në fshatin Bishan kanë pasur prezencë uji në oborre, ndërsa disa prej tyre edhe brenda ambienteve të shtëpisë. Sakaq, prurjet e Vjosës janë ulur ndjeshëm dhe niveli i lumit ka arritur në pesë metra, duke hyrë në shtrat. Në fshatin Novoselë, janë përmbytur trembëdhjetë banesa, banorët e të cilave janë evakuuar ditë më parën dhe janë rikthyer duke pastruar mbeturinat dhe baltën që lumi ka sjellë në pronat e tyre. Grupet e vlerësimit të dëmeve kanë dalë në terren dhe po kryejnë vlerësimet fillestare të përmbytjeve në banesa. Më pas, procesi do të vijojë edhe me vlerësimin e dëmeve në tokat bujqësore, në bujqësi dhe në blegtori.