Reagime të shumta ngjalli në Romë dhe Tiranë, intervista e shefit të diplomacisë shqiptare, Ferit Hoxha për Euractiv, ku sugjeronte se për aq kohë sa Shqipëria do të jetë vend anëtar i Bashkimit Europian në vitin 2030, nuk pritet të ketë një zgjatje të afatit të paktit me Italinë për kampet e emigrantëve në Gjadër dhe Shëngjin. Citimi i tij nga gazetari Eddy Wax, u përgënjeshtrua nga vetë ministri, si një keqkuptim dhe nxjerrje jashtë konteksti, ndërkohë që kryeministri Edi Rama reagoi menjëherë duke thënë se protokolli me Italinë do të qëndrojë në fuqi, për aq kohë sa Roma dëshiron. Giorgia Meloni iu përgjigj homologut të saj shqiptar me një fjali të shkurtër: “Grazie Edi.” Zhurma e krijuar në rrjet qoftë në Shqipëri po ashtu edhe në Itali, u pasua nga një tjetër shkrim sqarues nga gazetari i Euractiv, Eddy Wax, i cili duke u nisur nga emri i tij i njëjtjë me kryeministrin shqiptar, e titulloi shkrimin: “Edi kundër Eddy-t”.