Shqiptarët kërkojnë më shumë certifikata, vërtetime për deklarimin e kontributeve nga punëdhënësit, karta shëndeti dhe në fund dëshmi penaliteti. Këto janë dokumentet e kërkuara më shumë gjatë muajit gusht përmes faqes zyrtare të e-Albania. Të dhënat zyrtare lidhur me këtë muaj tregojnë se u bënë rreth 144 mijë aplikime për certifikatë familjare, ndërkohë që në vend të dytë është shërbimi për të marrë vërtetim për pagesën e kontributeve. Aplikimi i formularit për lëshim ose rinovim të pasaportës ishte i treti me 102 mijë aplikime. Edhe shtetasit që jetojnë jashtë kanë pasur një numër të lartë aplikimesh për pasaportë dhe kartë identiteti në nivelin 63 mijë aplikime. Gjatë muajit gusht edhe pse afati i fundit ishte 31 korriku ka vijuar aplikimi për depozitimin e pasqyrave financiare dhe raporteve të auditit duke kapur nivelin mbi 55 mijë. Në listën e dhjetë shërbimeve më të përdorura janë renditur edhe deklarimi i kontributeve nga punëdhënësit, pagesa e energjisë, aplikimi për kartë shëndeti dhe e fundit certifikata e gjendjes gjyqësore(dëshmia e penalitetit).