Kryeministri britanik Keir Starmer pritet të diskutojë sigurinë evropiane dhe ndikimin e mundshëm të një presidence të dytë të Donald Trumpit, në një takim me presidentin francez Emmanuel Macron në Paris gjatë ditës. Përpara pjesëmarrjes në një ceremoni në Varrin e Ushtarit të Panjohur, Macron dhe Starmer pritet të diskutojnë për pushtimin rus të Ukrainës dhe situatën humanitare në Gaza, tha Doëning Street. Takimi i tyre vjen pasi ka shumë shqetësime në lidhje me mbështetjen e presidentit të zgjedhur të SHBA-së, Donald Trump për Ukrainën, pasi ai tha se mund t'i jepte fund luftës me Rusinë "brenda një dite". Tregtia do të jetë gjithashtu në axhendë, me Trumpin që ka thënë se do të vendosë një tarifë totale prej 20% për importet në SHBA. Disa ekonomistë kanë paralajmëruar për ndikimin global të tarifave të tilla, me parashikimin e një goditjeje të mundshme prej 22 miliardë paundësh ndaj eksporteve në Mbretërinë e Bashkuar. Kryeministri britanik, i pari që merr pjesë në ceremoninë në Champs Elysee që nga Ëinston Churchill në 1944, do të takohet gjithashtu edhe me kryeministrin francez Michel Barnier. Ndër temat që mund të diskutohen në takim janë Ukraina, Lindja e Mesme, emigrimi dhe shtytja e qeverisë për një "rivendosje" të marrëdhënieve me BE-në. Për Ukrainën, liderët pritet të diskutojnë se si të sigurohen që forcat e saj të jenë në pozicionin më të mirë të mundshëm përpara dimrit. Një temë e mundshme e diskutimit është edhe leja për ukrainën që të përdorë raketa me rreze të gjatë veprimi, Storm Shadoë, thellë në territorin rus. Këto raketa janë prodhim britaniko-francez. Por, pas muajsh diskutimesh për këtë çështje, vendimmarrësi kryesor për Londrën dhe Parisin mbetet Presidenti Biden, ndaj nuk pritet ndonjë përparim. Pikëpyetjet që janë ngritur pas fitores së Trump në zgjedhjet presidenciale në SHBA, se çfarë mund të thotë mandati i tij i dytë për mbështetjen e SHBA për Ukrainën dhe NATO-n, janë po ashtu tema diskutimi.