Prokurorët e Nju Jorkut kanë thirrur ish-presidentin e Shteteve të Bashkuara të Amerikës, Donald Trump, për të dëshmuar para një jurie mbi çështjen Stormy Daniels. Ish-presidenti karizmatik është prej 5 vitesh nën hetim nga prokuroria e Manhatanit, në lidhje me pagesat e supozuara të parave, në emër të ish yllit të filmave për të rritur. Lajmin e ka bërë të ditur vetë avokati I Trump, teksa mediat amerikane raportojnë se thirrja e ish-presidentit për të dëshmuar para një jurie të madhe, tregon se ai mund të përballet me akuza. Zonja Daniels thotë se ajo mori 130,000 dollarë para zgjedhjeve të 2016 në këmbim të heshtjes për një raport seksual të saj me ish-presidentin e Shteteve të Bashkuara të Amerikës. Në atë kohë, Trump mohoi të ketë pasur një raport seksual me yllin e filmave për të rritur, megjithatë në 5 vitet e fundit hetimet mund të kenë nxjerrë në dritë të tjera fakte. Një juri e madhe krijohet nga një prokuror për të përcaktuar nëse ka prova të mjaftueshme për të ngritur akuzat ndaj një personi, teksa raportohet se për rastin në fjalë kanë dëshmuar tashmë edhe disa ish-ndihmës të Trump, gjatë kohës që ai ishte president. Nëse prokurorët vendosin të vazhdojnë përpara me ngritjen e akuzave, atëherë kjo mund të jetë çështja e parë penale e ngritur ndonjëherë kundër një ish-presidenti të SHBA-ve. Vlen të theksohet se Trump po hetohet për disa çështje, teksa thirrja për të dëshmuar vjen në një kohë kur 76-vjeçari ka nisur një tjetër fushatë për t’u rikthyer në Shtëpinë e Bardhë. Pamjet: AFP