Sekretari i Përgjithshëm i Kombeve të Bashkuara, Antonio Guterres, bëri thirrje që inspektorëve ndërkombëtarë t’u jepet akses në centralin bërthamor të Zaporizhjas. Apeli i Shefit të OKB vjen pasi Ukraina dhe Rusia shkëmbyen akuza lidhur me bombardimet gjatë fundjavës në centralin më të madh bërthamor në Evropë. “Çdo sulm në centralin bërthamor do të ishte një akt i vetëvrasjes”, tha Guterres gjatë një konference për shtyp në Japoni. Guterres i bëri këto komente pasi gjatë fundjavës vizitoi Hiroshimën, ku mbajti fjalim në 77-vjetorin e sulmit të parë me bombë bërthamore në botë. Ukraina tha se bombardimet e reja ruse, kanë dëmtuar tre sensorë të rrezatimit dhe është lënduar një punëtor në centralin bërthamor të Zaporizhjas, që ishte dita e dytë e grantimeve mbi këtë central. Presidenti ukrainas, Volodymyr Zelensky, ka akuzuar Rusinë se po kryen “terror bërthamor” që, sipas tij, duhet të nënkuptojë më shumë sanksione ndërkombëtare, këtë herë në sektorin bërthamor të Moskës. “Nuk ka shtet në botë që mund të ndihet i sigurt kur një shtet terrorist sulmon një central bërthamor”, tha Zelensky.