Organizata Freedom Houese me seli në Shtetet e Bashkuara raportoi se liria globale në internet ka rënë për të 14-tin vit me radhë, dhe se kjo ka ardhur nga dy faktorë censura dhe manipulimi i përmbajtjeve. Në raportin e publikuar, organizata thekson se qeveritë në të paktën 25 nga 72 vendet e përfshira në analizën e saj shkëputën qasjen në internet, kufizuan qasjen në platformat e mediave sociale ose bllokuan faqet e internetit që publikojnë përmbajtje politike, sociale dhe fetare gjatë periudhave elektorale, shpesh me synimin edhe tek rezultatet. Sipas raportit, qeveritë gjithashtu zgjodhën arrestimet, dhunën dhe format e tjera të shtypjes për të heshtur fjalën e lirë në internet jashtë periudhave elektorale. “Në të paktën 56 vende, përdoruesit e internetit u arrestuan për shkak të shprehjes së pikëpamjeve të tyre politike, sociale ose fetare. Njerëzit u sulmuan fizikisht ose u vranë si hakmarrje për veprimtaritë e tyre në internet në të paktën 43 vende një numër rekord i lartë”, shkruhet në raport. Freedom House flet po ashtu për pengim të gazetarëve për të raportuar dhunën.