Garda Revolucionare Islamike e Iranit ka ngritur celula të reja sekrete në Irak për të kryer sulme ndaj vendeve të Gjirit që strehojnë forcat amerikane, duke anashkaluar rrjetet e milicisë për të shmangur zbulimin, thanë tetë burime irakiane për Reuters. Tre ose katër celula, secila prej të cilave përfshinte rreth 10 luftëtarë myslimanë shiitë të elitës irakiane, kryen të paktën shtatë sulme me dronë nga vende në shkretëtirë pranë qyteteve jugore të Basrës dhe Samaëas, kundër shënjestrave në Kuvajt, Arabinë Saudite dhe Emiratet e Bashkuara Arabe mes 20 prillit dhe 17 majit, thanë tre nga burimet. Një numër anëtarësh të këtyre celulave u morën nga Rezistenca Islamike në Irak, një grup ombrellë i fraksioneve shiite të linjës së ashpër që numëron në radhët e tij mijëra luftëtarë. Por grupet e reja veprojnë jashtë strukturës së saj komanduese, duke raportuar drejtpërdrejt te Garda Revolucionare, sipas burimeve, që përfshijnë dy zyrtarë ushtarakë irakianë, një zyrtar tjetër sigurie dhe pesë komandantë të milicisë lokale. Krijimi i celulave të reja irakiane, i cili nuk është raportuar më parë, pasqyron një ndryshim në taktikat e Gardës revolucionare të Iranit që synon ruajtjen e aftësisë së Iranit për të projektuar forcë në të gjithë rajonin në një kohë kur grupet e armatosura ekzistuese janë dëmtuar rëndë dhe burimet ushtarake dhe ekonomike kanë shterur, thanë burimet. Iraku, një vend me shumicë shiite, ka një mori milicish, shumë prej të cilave mbajnë lidhje të ngushta me Teheranin. Ato formojnë një shtyllë kyçe të "Boshtit të Rezistencës" rajonale të Iranit, që shtrihet nga Gaza dhe Libani deri në Jemen dhe Irak. Grupet që veprojnë nën flamurin e Rezistencës Islamike në Irak kanë marrë përgjegjësinë për dhjetëra sulme me dronë dhe raketa kundër aseteve amerikane në rajon.