Kreu i Bashkisë së Tiranës, Erion Veliaj, ka takuar disa prej grupeve të turistëve që kanë vizituar këto ditë kryeqytetin. Teksa vetëm në një muaj Shqipëria është vizituar minimalisht nga 1 mln turistë, kryebashkiaku u tregoi atyre gjatë bisedës lidhur me transformimin e qytetit dhe potencialin turistik që ofron Tirana. Veliaj: "Është një kënaqësi e jashtëzakonshme që kemi një Tiranë plot me turistë sot. Është shumë e rëndësishme që kemi marrëdhënie shumë të mira mes shtetesh, mes qytetesh, por marrëdhëniet më speciale janë mes njerëzve, sepse çdo turist e qytetar kthehet në një ambasador që përhap lajme të mira për vendet që viziton dhe për eksperiencat që ka. Duke qenë se kemi një milionë turistë çdo muaj, sa dyfishi i popullsisë tonë, fakti që Tirana është ende e pastër, fakti që ende kemi respekt për njëri-tjetrin në grup, fakti që respektojmë trafikun, që i lëmë hotelet dhe Airbnb në gjendje siç i gjetëm, meriton gjithë falenderimin dhe respektin nga ana ime". Turistët e pranishëm u shprehën entuziastë për mikpritjen që ofron Tirana, duke vlerësuar ndryshimet pozitive që kanë ndodhur në qytet dhe shprehën dëshirën për t'u kthyer përsëri.