Në një seancë që ka zgjatur vetëm pak minuta në dhomën e një spitali privat, të miturit Mario Prelleshaj iu komunikua masa e arrestit me burg për vrasjen e bashkëmoshatarit 14-vjecar, Martin Cani, pranë shkollës 9-vjecare ‘Fan Noli’ më 18 nëntor. Seanca e vlerësimit të masës së sigurisë u mbajt në ambientet e një spitali privat të kryeqytetit ku i mituri po merr mjekim për shkak të plagës që ka marrë në dorë prej ditës kur ndodhi vrasja. Organi i akuzës e ka riklasifikuar krimin, duke kërkuar në gjykatë masën “arrest me burg për akuzën e "vrasjes në rrethana cilësuese ndaj të miturit ", si edhe "mbajtje pa leje të armëve të ftohta". Sipas burimeve Mario Prelleshaj vijon të mos bashkëpunojë me autoritetet për të treguar armën e ftohtë me të cilën kreu krimin. Ngjarja e rëndë ndodhi të hënën e 18 nëntorit, ku viktima Martin Cani dhe autori nxënës të shkollës 9-vjeçare 'Fan Noli', u përplasën fizikisht, pas një sherri që kishte nisur në oborrin e shkollës më herët. Kodi Penal parashikon për këtë akuzë, minimalisht 20 vite burg deri në dënim maksimal burgim të përjetshëm, por në rastin e 14-vjecarit, Mario Prelleshaj, kur autorët janë të mitur parashikohet përgjysmimi i dënimit.