Ministri në detyrë për Evropën dhe Punët e Jashtme, Gent Cakaj gjatë vizitës në Kosovë, zhvilloi një takim me Presidenten në detyrë të Vjosa Osmanin. Takimi u fokusua në diskutimin e hapave konkretë në funksion të bashkëpunimit strategjik në fushën e politikës së jashtme dhe rëndesinë e qasjes absolutisht të bashkërenduar në arenën ndërkombëtare të dy vendeve. “Kosova dhe Shqipëria, si dy shtete që i takojnë një kombi, duhet të jenë një zë i vetëm, sa i përket politikës së jashtme”, shkroi Cakaj në një reagim të tij ë Facebook, lidhur me takimin e zhvilluar me Osmanin. Më herët Cakaj u takua me Kryeministrin e Kosovës, Avdullah Hotin. Në fokus të takimit ishte rëndësia e patjetërsueshme të qasjes së bashkërenduar, mes Kosovës dhe Shqipërisë, për mbrojtjen e të drejtave të shqiptarëve të Luginës së Preshevës. “Shprehëm shqetësimin e thellë lidhur me procesin e fshirjes së qëllimshme të adresave të shqiptarëve në Medvegjë, Bujanoc dhe Preshevë”- tha Cakaj në një postim të tij në Facebook, lidhur me takimin e zhvilluar. Bashkëfolësit ndanë pikëpamje të njejtë mbi dialogun Kosovë-Serbi, i cili sipas tyre duhet të përfundojë me njohjen e Kosovës nga ana e Serbisë.