Parlamenti i indisë u ndal të mërkurën pas një thyerje të sigurisë që bëri që dy persona të ndërprisnin seancën duke hedhur një bombul tymuese brenda sallës. Të dy ata u arrestuan nga forcat e sigurisë, bashkë me dy persona të tjerë jashtë ndërtesës, pasi një burrë u hodh në sallën e parlamentit nga një galeri për vizitorët. Pamjet e transmetuara në televizion, tregonin një burrë që lëshonte disa slogane dhe hidhej mbi tavolinat mes deputetëve të shokuar, para se të hidhte një mjet tymues. Motivet që shtynë dy personat të hynin dhunshëm në parlament dhe mënyra se si ata kishin mundur të anashkalonin cdo kontroll sigurie, nuk janë ende të qarta dhe policia e Nju Delhit pritet të japë detaje mbi incidentin. Parlamenti rinisi punimet pas një pushimi të shkurtër me kryetarin e tij që i tha ligjvënësve se katër persona ishin arrestuar për trazirën. Rreth 150 deputetë ishin në sallë në kohën e incidentit. Ngjarja erdhi në përvjetorin e 22 të një sulmi mbi ndërtesën e mëparshme të parlamentit në Nju Delhi. Pesë persona të armatosur qëlluan për vdekje të paktën tetë pjesëtarë të personelit të sigurisë dhe një kopshtar në atë kohë.