Qeveria shqiptare ka planifikuar që për vitin 2021, kryefjalë e buxhetit të jetë rimëkëmbja e ekonomisë. Kjo ishte tema kryesore e diskutimit në Konferencën e Kryetarëve që miratoi kalendarin e shqyrtimit të projektligjit “Për buxhetin e vitit 2021”. Pas prezantimit, Ministrja Denaj iu përgjigj pyetjeve të deputetëve dhe bëri shpjegimet e nevojshme. Ministrja e financave foli edhe për borxhin, ku përmendi shifrën e uljes e konsiderueshme të tij për vitin e ardhshëm. Në përfundim të mbledhjes së kryetarit, Kryetari i Kuvendit, Gramoz Ruçi, nënvizoi që, në zbatim të kalendarit, komisionet parlamentare, në bashkëpunim me ministritë e linjës, të marrin gjithë kohën e nevojshme për organizimin e diskutimeve shterruese për projektligjin “Për buxhetin e vitit 2021”. Konferenca vendosi, gjithashtu, që për shkak të kalendarit të veçantë të shqyrtimit të projektligjit “Për buxhetin e vitit 2021”, të zhvillohet seancë plenare edhe në datën 29 tetor, e cila ishte planifikuar si “Javë e gjelbër”.