Qeveria federale e SHBA-së pritet të nisë në ditët në vijim testimin e inteligjencës artificiale në procesin e intervistimit dhe përzgjedhjes së kandidatëve për punë. Teknologjia do të testohet përmes platformës CodeSignal, në kuadër të programit “Tech Force”, i nisur rreth tetë muaj më parë për të rekrutuar ekspertë të teknologjisë nga sektori privat në poste qeveritare me kontrata dyvjeçare. Sipas planit, agjentë virtualë të inteligjencës artificiale do të kryejnë intervistat e para me kandidatët, përmes telefonit, audios ose tekstit. Më pas, rekrutuesit do të marrin regjistrime dhe transkriptime të intervistave për të vlerësuar kandidatët. Qeveria federale, e cila punëson rreth 1.9 milionë persona, po përpiqet të modernizojë procesin e rekrutimit. Zyra e Menaxhimit të Personelit ka inkurajuar agjencitë federale të përdorin IA-në, por me mbikëqyrje njerëzore, veçanërisht kur bëhet fjalë për vendime të rëndësishme për personelin. IA përdoret tashmë në disa struktura qeveritare, ku punonjësit kanë akses në mjete si Microsoft, Claude, ChatGPT dhe Google Gemini. Zyrtarët amerikanë presin që përdorimi i inteligjencës artificiale në rekrutimin federal të bëhet gjithnjë e më i zakonshëm.