Drejtoria e Përgjithshme e Burgjeve sqaroi se kryebashkiaku Erion Veliaj nuk ka qenë më parë i dënuar. Pas verifikimeve të bëra në regjistrin e gjendjes gjyqësore, burgjet sqarojnë, se ai rezulton i padënuar dhe ndaj tij janë dhënë tre vendime pafajësie. “Sqarojmë se, në rastet kur kërkohet vërtetimi me historik, përfshihen edhe të dhënat mbi vendimet e mëparshme, përfshirë pafajësitë apo vendimet e rehabilitimit, në përputhje me legjislacionin në fuqi.”, thuhet në njoftimin e Drejtorisë së përgjithshme të Burgjeve. Ndërkohë më herët SPAK sqaroi se iu referua certifikatës elektronike të gjendjes gjyqësore për informacionin ndaj Veliajt I cili rezultoi “i dënuar”. Gjë që u mohua prej kryebahskikaut gjatë seancës së masës së sigurisë si dhe u pranua që ishte gabim nga ana e SPAK. “Në lidhje me këtë certifikatë, Prokuroria e Posaçme i ka kërkuar informacion Drejtorisë së Përgjithshme të Burgjeve në lidhje me veprat penale si edhe vendimet gjyqësore, të cilat lidhen me certifikatën elektronike që është gjeneruar. Me shkresën nr. 2215/1 datë 12.02.2025, Drejtoria e Përgjithshme e Gjendjes Gjyqësore ka sqaruar mes të tjerave se:…çdo herë kur printohet Vërtetimi i Gjendjes Gjyqësore me shënime, del dhe statusi i dënuar si në këtë rast. Shtetasi E. L. V. ka 3 vendime pafajësie.”, njoftoi SPAK më herët.