Avokati i Popullit ka rekomanduar mbylljen e gjashtë burgjeve në vend, që gjatë monitorimit janë gjetur me kushte të papërshtatshme. Institucionet për të cilat janë evidentuar problematika të vazhdueshme përfshijnë burgun e Burreli, atë të Lushnjes, burgun e Kukësit, Mine Pezën dhe 313 në Tiranë dhe burgun e Tepelenës. Në këto institucione, thotë Avokati i Popullit, janë konstatuar ambiente të amortizuara, mungesë hapësirash, lagështirë, ajrim dhe ndriçim i pamjaftueshëm, kushte higjieno-sanitare të papërshtatshme dhe vështirësi në ofrimin e shërbimeve shëndetësore e rehabilituese. Këto kushte, thuhet në raport, cenojnë dinjitetin dhe integritetin fizik e psikologjik të personave të privuar nga liria, si dhe bien ndesh me standardet kombëtare dhe ndërkombëtare për trajtimin e të burgosurve. Në këtë kuadër, Avokati i Popullit i ka rekomanduar Ministrit të Drejtësisë dhe Drejtorisë së Përgjithshme të Burgjeve mbylljen e këtyre institucioneve. Problematika tjetër e evidentuar në raport është mbipopullimi i burgjeve. Avokati i Popullit gjen mbipopullim te 313, me 55 të burgosur mbi kapacitetin maksimal të institucionit, te burgu i Vlorës, ai i Fushë Krujës dhe i Lezhës, me këtë të fundit që mban rekordin me 181 të burgosur mbi kapacitetet e institucionit.