Prokurori i Gjykatës Ndërkombëtare Penale tha një ditë më parë se kishte kërkuar urdhër-arresti për kryeministrin izraelit Benjamin Netanyahu, shefin e tij të mbrojtjes dhe tre liderë të Hamasit, për krime të dyshuara lufte. Prokurori Karim Khan, tha në një deklaratë të lëshuar pas më shumë se shtatë muajsh lufte në Gaza se ai kishte arsye të besonte se të pestë ata "mbartin përgjegjësi penale" për krime të dyshuara lufte dhe krime kundër njerëzimit. Ai tha se kishte kërkuar një urdhër arresti për ministrin izraelit të Mbrojtjes Yoav Gallant si dhe për Netanyahun pasi kanë urdhëruar dhe kryer ofensivën e Izraelit kundër Hamasit në Gaza. Khan po ashtu ka kërkuar arrestimin e shefit të Hamasit, Yahya Sinëar; Mohammed Al-Masri, komandanti i përgjithshëm i krahut ushtarak të Hamasit, i cili njihet gjerësisht si Deif; dhe Ismail Haniyeh, kreu i Byrosë Politike të Hamasit. Një trup gjykues i procedurës paraprake do të përcaktojë nëse provat mbështesin urdhrat e arrestit. Por gjykata nuk ka mjete për të zbatuar urdhëra të tillë dhe hetimi i saj për luftën në Gaza është kundërshtuar nga Shtetet e Bashkuara dhe Izraeli.