Është lënë në masën “arrest me burg” ish- drejtoresha e filialit të Postës Shqiptare në Durrës, pasi dyshohet se janë grabitur rreth 69 milionë lekë të reja. Elisabeta Mataj do të mbahet në burg, ndërsa për shefen e financës Valbona Hoti Duni dhe arkëtaren Paola Dana u vendos masa e arrestit shtëpiak, megjithëse prokuroria kërkoi për të treja arrest me burg. Gjatë procesit gjyqësor, prokurori i çështjes përmendi elementin e frekuentimit të kazinosë prej drejtoreshës Mataj. Ajo nuk e mohoi frekuentimin e kazinove duke theksuar se “nuk ka ndonjë kontratë të firmosur që nuk mund të shkoj në lokale, bare dhe kazino”. Paratë e grabitura ishin destinuar për shpërndarjen e pensioneve dhe ndihmave sociale, ndërsa hetimet pritet të zbardhin mënyrën se si është realizuar skema, rolin e secilës prej të arrestuarave dhe destinacionin e shumës prej 69 milionë lekësh.