Venezuela ka dërguar 11 mijë trupa ushtarake për të rimarrë kontrollin e një prej burgjeve më të mëdha të saj që është drejtuar nga një bandë e fuqishme kriminale. Burgu Tocoron, në veri të vendit, ishte nën kontrollin e mega-bandës Tren de Aragua, prej vitesh. Të burgosurit ishin të lirë të endeshin brenda burgut, që ngjasonte më shumë me një hotel dhe ishte i pajisur me një pishinë, klub nate dhe një kopsht zoologjik të vogël. Zyrtarët thanë se 6 mijë të burgosurit do të transferoheshin në burgje të tjera. Edhe shumë banorë të lirë jetonin brenda burgut, bashkë me të dënuarit. Pasi autoritetet njoftuan se të burgosurit do të zhvendoseshin, disa të afërm të tyre nisën të qarat jashtë burgut, të pasigurt se ku ata do të shkonin..“Po pres të dëgjoj se ku do ta dërgojnë bashkëshortin tim...edhe unë po jetoja këtu por na nxorrën jashtë”, thotë Gladys Hernandez për agjencinë e lajmeve AFP. Raportohet ndërkohë se gazetarët kanë parë roja sigurie të nxirrnin motocikleta, televizorë dhe mikrovala nga burgu. Në një deklaratë të postuar në rrjetin social X, ministri i brendshëm i venezuelës përgëzoi zyrtarët për rimarrjen nën kontroll të burgut dhe goditjen e qendrës së konspiracionit dhe krimit. Lideri i bandës Tren de Aragua, Hektor Guerrero Flores, po kryente një dënim me 17 vite burg atje për vrasje dhe trafik droge. Sidoqoftë, ai ishte aq i fuqishëm sa që raportohet se hynte dhe dilte lirisht nga burgu...