Bullgaria është pajtuar që t’i dërgojë ushtrisë ukrainase 100 transportues të blinduar, duke shënuar një kthim në politikën e anëtarit të NATO-s për dërgimin e pajisjeve ushtarake Kievit pas zgjedhjes së qeverisë së re pro-Perëndimore. Dërgimi direkt i armëve ishte refuzuar nga qeveria e kaluar, e emëruar nga presidenti Rumen Radev. Ai shfaqet pro Rusisë dhe së fundmi ka thënë se Ukraina duhet të fajësohej për luftën dhe se dërgimi i armëve në Ukrainë vetëm e zgjat konfliktin, raportoi AP. Parlamenti të premten aprovoi propozimin e Qeverisë për ta kryer dërgesën e parë të pajisjeve të rënda ushtarake në Ukrainë që nga fillimi i luftës. Automjetet e blinduara të prodhimit sovjetik u dërguan në vitin 1980 në Bullgari. Bullgaria, e cila u anëtarësua në NATO më 2004, ende mban stoqe të armëve të prodhimit sovjetik. Presidenti I Ukrainës është përplasur së fundmi me presidentin e Bullgarisë duke e cilësuar si një lider prorus. Ukraina ka kritikuar presidentin Rumen Radev lidhur me komentet e tij se Kievi është fajtor për luftën e vazhdueshme të Rusisë dhe se furnizimi me armë i Ukrainës vetëm sa e zgjat konfliktin. Pamjet: AFP