Zyrtarët e Bashkimit Europian kanë ndërmend t`I vazhdojnë përpjekjet për rifillimin e dialogut për normalizimin e marrëdhënieve mes Serbisë dhe Kosovës, por në planet e tyre nuk bën pjesë presidenti Hashim Thaçi, i cili i ka udhëhequr negociatat me Serbinë në emër të Kosovës për vite me radhë. Ndaj tij u paraqit javën që shkoi aktpadia e një prokurori të specializuar, nën dyshimin e përfshirjes në krime lufte dhe krime kundër njerëzimit. Thaçi vendosi të qëndrojë në pozitën e presidentit, duke thënë se ai do të jepte dorëheqje vetëm nëse konfirmohen pretendimet e aktpadisë nga ana e gjykatësit të procedurës paraprake. Zyrtarët e BE-së deklaruan se pas këtyre zhvillimeve, nuk e konsiderojnë më presidentin e Kosovës, një partner në procesin e dialogut. "Në reagimet tona deri më tani, ne kemi thënë midis rreshtave, se do të ishte më mirë që ai Thaçi të përqëndrohet në aktakuzën e tij dhe derisa çështja të zgjidhet, pra të ketë një aktgjykim, nga ana e BE-së do të ketë shumë pak ndërveprim me të", tha për Radion Evropa e Lirë një zyrtar europian që merret me procesin e dialogut Kosovë-Serbi. Në çdo rast, BE-së vlerëson se Prishtina zyrtare do të vazhdojë të jetë e përkushtuar për dialog, pavarësisht se kush e zhvillon atë në emër të Kosovës. Synimi është që shumë shpejt të organizohet një samit në Paris, ku do të takohen delegacionet e Kosovës dhe Serbisë, mikpritës të të cilit do të jenë presidenti i Francës, Emanuel Macron, dhe kancelarja gjermane, Angela Merkel. Takimi ka të ngjarë të mbahet në 10 korrik.