Ukraina do të shtojë sulmet me rreze të gjatë brenda Rusisë pasi miliarda dollarë armë të reja do të vijnë në vend, thotë shefi i Shtabit të Mbrojtjes në Britaninë e madhe. Admirali Tony Radakin sinjalizoi se Britania nuk kishte kundërshtim ndaj sulmeve në tokën ruse. Ai tha se ngarkesat me armë të reja perëndimore do të ndihmonin sulmet. "Aftësia për të kryer operacione të thella do të bëhet gjithnjë e më shumë një tipar i luftës", tha Radakin. Deklaratat e tij vijnë pasi presidenti amerikan, Joe Biden, firmosi një paketë ndihmash ushtarake 60 miliardë dollarëshe për ukrainën. Por armët amerikane vijnë me një paralajmërim se ato duhet të përdoren vetëm në territorin sovran të Ukrainës. Raketat me rreze të gjatë të ofruara nga SHBA thuhet se u përdorën javën e kaluar për të goditur objektivat ruse në Krimenë e pushtuar. Britania ka premtuar më shumë se 1600 armë me rreze të gjatë, duke përfshirë raketa Storm Shadoë dhe bomba të drejtuara me lazer Paveëay IV. Mbretëria e Bashkuar ra dakord për një ndihmë ushtarake shtesë prej 500 milionë paundësh për Ukrainën javën e kaluar, duke e çuar kontributin e saj në 3 miliardë paundë këtë vit. Presidenti Volodymyr Zelensky thotë se Ukraina ka nevojë dëshpërimisht për më shumë mbrojtje ajrore për të zbrapsur raketat e Moskës.