Britania e Madhe ka kryer një test "të rëndësishëm" në programin e saj të armëve hipersonike në "bashkëpunim të ngushtë" me qeverinë amerikane, tha të dielën Ministria Britanike e Mbrojtjes. Arma hipersonike udhëton me shpejtësi pesë herë më të madhe se shpejtësia e zërit, ose Mach 5, shpejtësi kjo afërsisht ekuivalente me më shumë se 6 mijë kilometra në orë. Raketa është në gjendje të manovrojë në mes të fluturimit, cka e bën atë jashtëzakonisht të vështirë për t'u gjurmuar. Ato mund të lëshohen nga toka, deti ose ajri dhe janë veçanërisht të përshtatshme për sulme me rreze të gjatë veprimi. Rusia ka investuar shumë në zhvillimin e raketave hipersonike, duke ecur përpara me programet e saj të kushtueshme ndërkohë që ka goditur tashmë Ukrainën me raketa si Kinzhal dhe Zirkon. Të dyja këto ishin ndër "super armët" e prezantuara nga presidenti rus Vladimir Putin në 2018. Mbretëria e Bashkuar tha në nëntor se po përshpejtonte zhvillimin e raketave hipersonike "të rëndësishme" si pjesë e AUKUS, marrëveshjes trepalëshe të sigurisë midis SHBA-së, Britanisë së Madhe dhe Australisë. Sipas sekretarit britanik të mbrojtjes, Xhon Hejli, asnjëherë më parë nuk ka qenë më e rëndësishme për aleancën, që të rinovojë kapacitetet e saj dhe të qëndrojë e bashkuar përpara kundërshtarëve, duke pajisur forcat e armatosura me teknologjinë e së ardhmes. Ministria britanike e Mbrojtjes tha se shpreson të ketë gati raketën e re deri në fund të dekadës.