Mbretëria e Bashkuar “nuk është e detyruar të zgjedhë mes SHBA-së dhe BE-së”, tha kryeministri Keir Starmer pasi Presidenti Donald Trump kërcënoi Bashkimin Evropian me tarifa tregtare. Gjatë fundjavës, Trump njoftoi tarifa 25% për Kanadanë dhe Meksikën, të cilat janë ndërprerë që atëherë, dhe tha se do të ndërmerrte veprime të ngjashme kundër BE-së, por sugjeroi se një marrëveshje mund të "arrihej" me Mbretërinë e Bashkuar. I pyetur nëse do të ishte i gatshëm të ndalte përpjekjet për të krijuar lidhje më të ngushta me BE-në në këmbim të mbajtjes në krah të SHBA-së, Keir Starmer tha se të dyja marrëdhëniet ishin të rëndësishme për Mbretërinë e Bashkuar. “Kjo për mua nuk është diçka e re, mendoj se kështu ka qenë gjithmonë dhe do të jetë kështu edhe për shumë e shumë vite në vazhdim”, shtoi ai. Kryeministri britanik tha në një konferencë shtypi në Bruksel se ishte ende herët për sa i takon bisedimeve për tarifat me SHBA-në dhe se ai mbështet "marrëdhëniet e hapura dhe të forta tregtare". Keir Starmer ishte në Belgjikë për të takuar Sekretarin e Përgjithshëm të NATO-s Mark Rutte dhe për të marrë pjesë në bisedime me liderët e BE-së, kryeministri i parë britanik që e bën këtë që nga Brexit.