Ambasadori i Mbretërisë së Bashkuar në Kosovë, Jonathan Hargreaves, përmes një postimi në FaceBook i ka kërkuar Komisionit Qendror të Zgjedhjeve që të respektojë procedurat ligjore në rastin e certifikimit të Listës Serbe. “I bëj thirrje Komisionit Qendror të Zgjedhjeve të Republikës së Kosovës që të sigurojë se procesi zgjedhor të kryhet me integritet dhe bazuar në procedura të drejta ligjore, e jo mbi interesa politike”, shkroi Hargreaves. “Presim që KQZ-ja dhe të gjithë anëtarët e saj të vlerësojnë certifikimin e Listës Serbe sipas një zbatimi gjithëpërfshirës, transparent dhe të qëndrueshëm të rregulloreve përkatëse”, tha diplomati. Ambasadori kërkoi nga KQZ-ja dhe anëtarët e saj që të jenë gjithëpërfshirës dhe transparent. Komisioni Qendror i Zgjedhjeve (KQZ) nuk e certifikoi Listën Serbe për pjesëmarrje në zgjedhjet parlamentare të 9 shkurtit.