Zëvendëspresidenti amerikan JD Vance, tha se Britania kishte "dështuar për fakt të udhëheqjes së saj, prej një kohe të gjatë", duke shtuar se shpresonte që kryeministri i ardhshëm i vendit të mund të sillte ndryshimin strukturor që votuesit kërkojnë pas viteve me trazira politike. Në një intervistë me gazetën Sunday Times, Vance tha se ndryshimet e shpeshta të qeverisë tregonin probleme më të thella në politikën britanike. Kryeministri Keir Starmer njoftoi muajin e kaluar se do të jepte dorëheqjen pas dy vitesh në detyrë, duke i hapur rrugën kryeministrit të shtatë të Britanisë në një dekadë. Ligjvënësi Andy Burnham pritet gjerësisht të pasojë Starmer pasi doli si kandidati i vetëm për të zëvendësuar udhëheqësin në largim. "Ajo që shoh janë gjashtë kryeministra në vitet e fundit", i tha Vance gazetës britanike. "Dhe kjo më tregon se diçka nuk shkon në politikën britanike dhe se njerëzit po kërkojnë vërtet ndryshime të rëndësishme strukturore. Shpresoj që Andy Burnham, nëse jo ai dikush tjetër, të jetë në gjendje ta bëjë këtë", tha zëvendës presidenti, duke shtuar se "kushdo që të jetë kryeministri, do të gjejë një mënyrë për ta rikthyer Britaninë në rrugën e duhur". Vance, bashkëshortja e të cilit ka studiuar në Universitetin e Kembrixhit, ka folur shpesh për dashurinë e tij për Britaninë, dhe e ka përshkruar atë si një "vend të mrekullueshëm" me "njerëzit më të mrekullueshëm në botë" jashtë Shteteve të Bashkuara. Komentet e tij vijnë pas një marrëdhënieje ndonjëherë të pasigurt, por kryesisht funksionale mes Starmer dhe Presidentit amerikan, Donald Trump.