Kryeministri i Mbretërisë së Bashkuar, Andy Burnham, ka deklaruar se Londra do të vazhdojë të mbështesë Ukrainën, pavarësisht paralajmërimeve të Rusisë për “pasoja”, pas konfirmimit se dronë të prodhuar në Britani janë përdorur në sulmet e fundit ukrainase në territorin rus. “Ne nuk jemi miq vetëm në kohra të mira. Ne do të jemi aty në kohët e vështira të Ukrainës dhe kjo nuk do të ndryshojë”, tha Burnham. Deklarata e tij vjen pasi Ambasada ruse në Mbretërinë e Bashkuar akuzoi Londrën se ka zgjedhur “qëllimisht një përshkallëzim të krizës në Ukrainë”. “Sa më e thellë të jetë përfshirja e saj në konflikt, aq më i lartë do të jetë çmimi që do të paguajë”, deklaroi ambasada, duke paralajmëruar se veprimet e Londrës “në mënyrë të pashmangshme do të sjellin pasoja”. Moska nuk ka specifikuar se çfarë lloj masash mund të ndërmarrë. Britania ka qenë një nga mbështetësit kryesorë të Ukrainës që prej nisjes së pushtimit rus në shkurt të vitit 2022. Londra ka furnizuar Kievin me armë, teknologji dronësh dhe raketa Storm Shadoë, ndërsa në prill njoftoi një paketë të re ushtarake që përfshinte dhjetëra mijëra dronë, mes tyre edhe pajisje me rreze të gjatë veprimi.