Bashkëshortja e sëmurë e ish-diktatorit sirian Bashar al-Assad thuhet se është ndaluar të kthehet në Britani për trajtimin e kancerit pasi i ka skaduar afati i pasaportës. Asma al-Assad, 49 vjeç, nuk do të jetë në gjendje të kthehet në vendlindjen e saj në Londër pa dokumentet e saj zyrtare të udhëtimit, mes raporteve se ajo është e sëmurë rëndë me leucemi dhe ka 50 për qind shanse për të mbijetuar. Kjo vjen pasi babai i saj i njohur kardiolog, Faëaz Akhras, u largua nga klinika e tij në Harley Street në atë që duket të jetë një përpjekje për t'u kujdesur për vajzën e tij që mori azil në Rusi pas rënies së regjimit brutal të bashkëshortit të saj. Ditët e fundit kanë qarkulluar spekulime se Asma po kërkon të divorcohet nga Assadi dhe se ajo dëshiron të kthehet në Britani për të vazhduar trajtimin e saj jetik për kancerin. Burime nga Londra, megjithatë, kanë konfirmuar se Asma, e cila gjithashtu ka shtetësi siriane, nuk posedon më dokumentacion të vlefshëm britanik udhëtimi, pasi pasaporta e saj i ka skaduar në vitin 2020. Zyrtarët kanë deklaruar ndërkohë se qeveria britanike nuk do ta lejojë atë të kthehet pasi vendimi nuk mund të bazohet vetëm në arsye shëndetësore. Më herët, sekretari i jashtëm David Lammy, u tha deputetëve se Asma, e cila ka lindur dhe është rritur në Acton, në perëndim të Londrës, 'nuk është e mirëpritur në Britani'. Asma u bë zonja e parë e Sirisë në vitin 2000 pasi u martua me Assad, 59 vjeç, në Siri, në të njëjtin vit kur ai mori kontrollin e vendit, pas vdekjes së babait, Hafez al-Assad. Kritikët besojnë se ajo ka rol në diktaturën e Assadit dhe në 2012 ajo u vendos nën sanksione nga Britania e Madhe dhe BE. Asma aktualisht ndodhet në Moskë me bashkëshortin dhe tre fëmijët e saj pasi familja mori azil nga Vladimir Putini kur rebelët morën kontrollin e Damaskut më 8 dhjetor.